تحديث لمفردات القاموس الشامي ومع أنه بسيط إلا أننا أضفنا في شهر أكثر مما يضيفه "المورد" في سنة · شرنه انشالله تكونوا استفدتوامشان اذا حدا حكى معكن باللهجة الشامية يكون عندكن فكرة عن القصد مع باقة ياسيمين من احدى بيوت الشام مايا
· شاضومة
تعبير مؤنث لا مذكر له يفيد كون المرأة غير مرتبة وليست من الأكابر وتحب الكلام غير المنمق وكثرته
(إنظر الشرح في تفسير مصطلح شاضومه )
· ملحو على ديلو
يعني لا يقيم وزناً للعشرة والخبز والملح
· يلي بالي بالك
كناية عن أمر يتعذر ذكره
· معصمص
نحيل بارز العظام صغيرها
· يا إيدكم!
تعبير عن الهرب من شيء ما بسرعة
· زمق
أي هرب ببراعة وحذق، وزمط شرحو
· سرّي مرّي
أي جيئة وذهاباً بشكل متكرر إلى حد الغلاظة وتتبعها أحياناً أو تنوب عنها (خدني جيتك) و(كيلي ميلي)
· حط بالخرج
أي لا تعبأ بما يقال
· على قفا مين يشيل
كناية عن كثرة الشيء وشيوعه و(قابر القنى) مثلها
· مأنّف
يعني لا يعجبه العجب ولا الصيام برجب
· فش نيعو
يعني انتقم منه شر انتقام وهي بالحلبي: يفشر حنكو
· أزّت نفسو
أي نفر من الشيء نفوراً كأنه رأى صرصوراً
· جفص
صفة للجلف غليظ الروح
· حنتر
أي "تيّس" و"بوزم" في الوقت نفسه
· طلع من عيونو عامص
يعني دفع ثمناً غالياً وندم على ما نالتحديث لمفردات القاموس الشامي ومع أنه بسيط إلا أننا أضفنا في شهر أكثر مما يضيفه "المورد" في سنة
· كل طلقة براحة
أي يقوم بالشيء رويداً رويداً بين الفينة والأخرى
· يلي بدو يموت يوصّيك بولادو
ذم بصيغة المدح يعني أن المذكور غير أهل لحمل المسؤولية
· على كراريت حلقو
يعني مصاب بغثيان شديد وإقياء لا يستطيع كبحه لا بحلال ولا بحرام
· لا تكرّك عليه
يعني لا تلح عليه إصراراً
· قلبه عميقول حق بق (كما قلنا أن القاف تقرأ ء)
يعني أنه يريد أمراً بشدّة لكنه يضمره إضماراً ولا يظهره إظهاراً ( مشان ما يزعل سيبويه)
· لحم السير عالقبقاب وصاروا المبغضين صحاب
مبينه وما بدها شرح
· يلي بيجي منمدلّه فرشة ويلي ما بيجي منرتاح من وشه
مثل نسائي بحت يفيد عدم الترحيب بأشخاص معينين ما عم يجوا أصلاً
· شو هالتجرة
يعني الأفندي ما عجبته هالحكاية كلها وحاسس إنو تعبو ذهب سدى أو أدراج الرياح (كمان مشان سيبويه الله يرحموا)
· وحياة خالقك ماني مفارقك
تعبير يفيد غلاظة المتكلم وتغالظه على المتكلم عنه ويتبعه عادة: مومحبة فيك بس بدي دايئك
· العين الطرّاءة
عبارة عن التمسخر على المتكلم عنه وأن لا شيء فيه بينحسد عليه
· بيقطش وبيلحش
يعني المهذار كثير الهفوات ومن يهرف بما لا يعرف ولسانه يسبق عقله
· ولي على كسرتو
تعبير يفيد التحسّر على شخص ما مع لومه على ما فعل (في تناقض، مهيك؟)
· كـــــــن
بكسر الكاف وتسكين النون يعني اهدأ أحسنلك
· كروج
يعني درمل، وبتعبير أفصح افرنقع من هنا، وادحال مثلها
· فــز
كمان بكسر الفاء يعني قوم (أوقف وانت بتكلمني)
· جماش
أي همجٌ رعاع مستجحشون
· مصطهج
يعني مسلطن، مكيّف، مبسوط أو كما قال سيبويه: منتشي
· أفّّعت معو
يعني حمل القشة التي قصمت ظهر البعير وبلغ السيل الذبى
· مو نفعان لا للخل ولا للخردل
يعني بلا فائدة تذكر، وأحياناً بقولو من نافع لألله بنافعة
· لاطيلو
يعني كمن له منتظراً ومنها المتل القائل: "قلّو لاطيلك قلّو صاحيلك" يعني هدول تنين ناويين عالشر لبعض وكل واحد منتبه للتاني بس بدون كبريته ليشعلو
· ادفشو وشوف ما أجحشو
يعني بالإنكليزي: Fools rush in where angels fear to tread
· ما فيه الوتكة
يعني صاغ سليم خالي من العيوب وأحياناً يعني فاضي
· ما معو نكله
مفلّس وحالو عدم
· أول باشتان.....ثاني باشتان
طريقة النسوان في تعداد الأمور والأوامر والأسباب والمسببات
· بظّت عيونو
يعني جحظت العينان حتى كادت المقلتان تخرجان من محجريهما (على طريقة الجاحظ)
· سك
حقيبة تقليدية تصنع من قماش (مستعمل عادة) تستعمل للتسوق وخصوصاً من سوق الجمعة
· نازل عالمدينة (أو رايح عالشام)
يعني رايح عالسوق التحتاني، i.e. going downtown
· خسكار
كمية من العمل المقرر ليوم واحد أو بضاعة معدّة للبيع ضمن اليوم
· من دهنو سئّيلو
تعبير يفيد الكحتنة والجرب وصرف النقود على الشخص أو الشيء بعد أخذها منه دون التكلف عليه بقرش
· ما صرلو بالأصر إلا مبارح العصر
يعني أنه جديد على أمر ما وغرّ فيه وأحياناً تكون إشارة للنفاريش أي باللاتينية nouveau riche
· ولاد آدو
يعني المشكلجية والعونطجية وولادين الحرام (يالطيف الله يبعدون عنا وعنكن أولو آمين)
· سبرتاكو
القطعة الصغيرة التي تكون مسمّرة في كعب الكندرة النسائية من الأسفل (وبتطلع عند أول لبسة بالكنادر الوطنية)
· قراضة
يعني نوع عاشر، شي تعبان بنوب (متل الكنادر المذكورة آنفاً والمسمّاة عند البعض: بضاعة لا حول)
· متمسح
يعني واحد متبلد المشاعر والأحاسيس متل التمساح بفرد شكل (وبمعنى آخر: لا الحر بحرّو ولا البرد بضرّو)
· كل ما حدو بيت السلطان خيلهن بتمد الخنفسة رجلها
مثل شعبي يقال كناية لمن يحب الاشتراك دوماً في أمور لا ناقة له فيها ولا جمل، ولا فهم ولا علم له بها وهو يعتقد أن له ما للآخرين
· اندفس
أي: نام أحسنلك، انقبر
· تكورت
متل تدولق، فعل يفيد تناول الطعام، وتزهرم مثله أيضاً
· من بيت شقاع لبيت رقاع (وهي تقرأ كالعادة: من بيت شآع لبيت رآع)
تعبير نسواني عن المرأة الشطاطة النطاطة التي تنتقل من بيت لآخر ولو بالشحاطة
· عم يحاسب القاضي
أي يقوم بقضاء حاجته في بيت الخلاء
· آرعو ونادبو وشــ*شــ*ي وأبو مخطة
أي سوقة القوم والرعاع
· يلي ببالك منو
كناية عن أمر يتعذّر ذكره لأسباب عديدة
· انطمز
أي انزعج وبوزم وقلب خلقتو وما عاد يتحاكا
· مطهمز
أي مطأطأ أو مطأطئ الرأس
· طمبرو (جديد جداً )
أي خورفو وهي بالمعنى الحرفي ركبلو طمبر وفهمكم كفاية
· شامم ريحه كرهه
تطلق على المتكبر يلي رافع مخاره وقالب وجهه
· آكل كم بحالو
انظر تفسير شامم ريحه كرهه
· خود منّي
إنهاء للنقاش ودعوة الطرف الآخر للثقة بما يقول المتكلم دون نقاش.
· دواليب الجنة
مصطلح جديد للفلافل ومحاولة لرفع شأن هذه الأكلة الشعبية
· عليّي ما عليّي
قسم يريد به المتكلم أن يحلف بالطلاق ولكن سمع أنو هذا لا يجوز فبطلها واستعاض عنها بهذه العبارة.
· سم الكرّاتي
تقال عندما يكثر الطرف الآخر من الأكل.
· فجعان
أي الحالوش أو الشره
· مكلولك
أي اللألوء الذي يحب تمسيح الجوخ.
· كعي في
يعني كثير ألح وأصر عليه ولكن الطرف الآخر يرفض
· طرفنده
تعبير مؤنث يدل على أنه شيء جميل جداً ومميز
أضف تعليقا
من سوريا
مساء الخير ميوش ..
ولك نسيتي المصطلحات هي :
زحل أعلي
من بيت الزط طلع مأدن
يلي متلنا تعو لعنّا
يا سلّال
ايدي بزنارك
مجنط
شاطط وماطط
بنت عمي ابن عمي
فايت بالحيط
يوووه تشكلو آسي ((بعيد الشر عني ))
وضراب السخن
والله لتشووووف
معبا بنطرون
حيط بياخدو وحيط بيجيبو
شندي يندي
شحوكة
رايح بالعبطة
عاطسو من مناخيرو
بتخطفي الكباية من راس الماعون
بدي بلبص عيونك
والله وفي كتير بس نسيتن ...
شكرا ميوش
من الأردن
اختي ميوش
صباح الخير
وشكرا لك على
هذا القاموس الرائع
دمت بخير
بانتظارك
من سوريا
حبيبتي كالعادة ابدعتي بقاموسك يلي فوق العادة
دمتي صديقتي
بحبك .... هالة
ماراح اكتب اكتر من هيك بدي اضربها طناش وروح نام
من Satellite Provider
هلا بيك اختي
تسلمي وياريت تجمعينا الامثال الي تقال
بالمسلسلات السوريه الي نص الحوار امثال خاطر نعرف بعض معانيها .........
مواضيع حلوه ومسليه ومفيده
احلى من الكلام عن اوجاع الامه وامراض الحب ....
تسلمي
ناصر
من سوريا
جارتي العزيزة اللذيذة ميوش :
أدهشني هذا الوقت المجاني الذي صرفتيه على كتابة هذا المقال ال.......................
بصراحة أنت أكثر من أثبت أن الوقت أرخص سلعة في الشرق .
بس مع كل احترامي وحبي وشوقي بتمنى عليك الا تغامري بوقت الآخرين .
صهيب حسين
من سوريا
ميوش يا ميوش
بدك تضلي نايمة مو
فيقي ياعمري
فيقي
فيقي
انت يمكن تكوني مرتاحة بهالنومة
نوم الهنا
بس ما رح تكوني مرتاحة بعد اليوم اذا ما فقتي
فيقي
فيقي
قبيلة من الشياطين
من سوريا
الى حامل المسك
ولو على حسابك المدونة كلها
كالعادة بمرورك عبقت المدونة بطيب المسك
شكرا لهذا المرور
من سوريا
اهلين ابو حميد
ولك ما نسيتن يا تؤبرني بس هدول المصطلحات معانيها واضح شوي
وعلى كلن شكرا كتير لألك عالاضافات
وشكرا اكتر لمرورك يلي بحبو كتير
ميوش
من سوريا
اخي قمة الفن
اهلا وسهلا فيك
ونورت المدونة
وانا دائمااستمتع بمدونتك
شكرا لك
من سوريا
هاااالة
لك على راسي انت ,وتحبك مكة انشالله يارب
بكفي انك مريت لعندي هادا الشي بيخليني مممممممممبسوطة كتير شلون انك حطيتي كلماتك عندي
روحي نامي تؤبشيني انشالله نوم العوافي
ميوش
من سوريا
اخي ناصر تكرم عينك
إن شاء الله بدي اعملي شي جلسة مع تيتي يعني(ستي) وخليها تنقلني كل الأمثال
يعني هو هي المواضيع من باب التغيير وطبعا صدقني ما حدا بينسى وجعو مو؟
شكرا ألك
من سوريا
جاري العزيز الفطحل........ صاحب اغلى وقت في شرق الدنيا وغربها!!!!
ادهشني ايها القاريء (الصهيب ) جهلك بالحكمة المعروفةالقائلة (لا يوجد شيء يقرأ رديء بالمطلق )
فإن كان رايك انه مضيعة للوقت فيكفيك انه اعطاك فرصة للتميز بين المادة الرديئة والمادة الجيدة لكن اتدري وأن كنت لا تدري فهلأ منخبرك أن المشكلة ليست بمضمون ما تقرأ بل بمضمون عقل القاريء
ملا قاريء
مع كل احترامي وحبي وشوقي
ميوش
من سوريا
جارتي العزيزة الفطحولة ( و فطحولة هنا للتدليع وليست للتصغير ).
1-أنا لم أدعي أنني صاحب أغلى وقت ولكنني أحاول ألا أهدره قدر المستطاع .
2-إن (صهيب ) اسم علم وليس بحاجة إلى ال التعريف .
3- إن كون (لا يوجد شيء يقرأ رديء بالمطلق ) مصنفة تحت بند الحكم لا يعطيها صبغة الحقيقة المطلقة فمثلا (هربوش خربوش عيوش ميوش ) كلام يقرأ فهل تستطيعين أن تدعي أنه ليس رديء!!!!! أتمنى ذلك .
4- أوافقك تماماً بما ورد في مسألة الفرصة التي منحتني إياها وشكراًلك على ذلك .
5- أما مسألة عقول القُراء فأعتقد أنه لا أنا ولا أنت ولا أحد يستطيع الإدعاء أنه فوق عقول القُراء لإن ذلك هو الغباء المطلق .
أما انو (ملا قارىء) فهدا رأيك , وأنالديَ الحق اْلا أكلف نفسي عناء الرد عليه.
والموضوع ماهو شخصي
مع حبي و قبلاتي
صهيب حسين
من سوريا
بصراحة نحن جيل يحترف "زطْ الحكي " بحرفية عالية جداً ، نحن (أيضاً) جيل كامل يحاول قتل الوقت دون رحمة وبشراسة ، لأننا نملك الكثير من وقت الفراغ الذي يملئ حيزاً في حياتنا اليومية ... فراغ قاتل يجعلك تكرر نفسك يومياً على مدار عقود متناثرة وبشكل متقارب .
تربطنا علاقة وطيدة مع الملل ، حتى أننا صرنا ندللّه ونخترع له مبررات تبرر وجوده اليومي في حياتنا ..
طبعا الكلام مش عام
ستالين
من سوريا
الصديقة ميوش :
كيفك ؟؟؟
كنت أتمنى أن لا يكون ردك على صهيب بهذه الطريقة ويكون أكثر تعقلاً وأقل عصبية .
بكافة الأحوال أنت لك كل الحق في الرد بالطريقة التي تعجبك وكما يقال
"البادي أظلم " .
أنا لست ضد النقد الذي يحمل الفائدة للجميع ولكن بعيداً عن التجريح والإهانة وكلامي هنا موجّه للمعلقين الذين لم يعجبهم المقال ورأوا أنه مضيعة لوقتهم ،وهو رأي يحتمل الخطأ والصواب وهذا من حقهم ، كما من حق صاحبة المقال أن ترد و تعتبر ما كتبته شيء جميل ويستحق القراءة .
أصدقائي :
علينا أن نبتعد عن التشنّج والتوتّر في طرح آرائنا ، ووجهة نظرنا .
والمكان هنا يتّسع للجميع .
شكراً لكم جميعاً . دمتم بخير .
محمد سعيد
من سوريا
عزيزي محمد
انا الحمد لله منيحة أنت كيفك ؟
وعلى كلن انت قلتها(و يلي بيدق الباب بيسمع الجواب) مو؟
وبدي وضح شغلة بسيطة لجميع المعلقين انا عشقانة ولهانة مغرمة .... وكل أعراض المحبين بتنطبق عليي
بقا اعذروني ....اعذروني واعذروا المحبة لحبها وانتو ادرى انو يلي بيعاني من حالة عشق بيعشق كل شي, كل شي بلا استثناء بمحبوبه:
ضحكه... بكائه
فرحه.... حزنه
وصاله ... جفائه
كلامه ....سكوته
.....حتى اصغر كلماته
وانا باختصار هي هي حالتي مع الشام بكل صراحة وشفافية
بقا يا ترى؟ الحق معي اكتب عن الشام بأدق تفاصيلها واصغر كلمات اهلها ؟؟
انا وردتكم الشامية يا أهل الشام
فمن وجدني منكم فليضعني في أول مزهرية
أنا شاعركم المجنون ياأهل الشام
فمن رأني منكم فليلتقط لي صورة تذكارية
انا قمركم المشرد يا أهل الشام
فمن رأني منكم فليتبرع لي بفراش وبطانية صوف
لأني لم أنم منذ قرون
(نزار قباني)
مع جزيل الشكر للجميع
اخي العزيز تحية طيبة ..
ساتكلم باللهجة العراقية ..
كلش حلوة هذا الموضوع .. راح استفادمنة هواية .. لاني مقبل على زيارة بلدي الثاني سوريا ..
ولك مني اطيب التحايا ولامنيات
يوسف السامرائي
من سوريا
بالمناسبة المورد الشامي قريب جدا من القاموس الحمصي (بضم القاف و الميم) . و استمتعت جدا بمتابعة المعركة البيضاء على صفحة التعليقات .. و لكني أشد على يدك سيدة ميوش في مسألة الوقت و إن كنت أرى القضية كلها مفتعلة و لا طعم لها ... و يا ميوش ما يهزك ريح!
من سوريا
إلى الأخ يوسف السامرائي
اهلا وسهلا فيك بسوريا وانشالله تكون استفدت
( للتنويه بس سقطت منك سهوا تاء التأنيث في أخي يعني لازم تكون أختي)
ودمت بخير جارتك مايا
من سوريا
جاري العزيز شفيق اذا كنت موفقة بقراءة الأسم بشكل صحيح
على راسي كل اهل حمص
بدك تقول مو معركة معركة هي يعني هن كانو عم يهزو الورد صحي كانو لح يخلعوهههههههه بس متل ما قلت ما بيهزو ريح
ومرة تانية اهلا وسهلا فيك على مدونتي وشكرا لزيارتك
مايا
من سوريا
مساء الخير
مررت للسلام والسؤال هل من جديد
من تركيا
تحيا الشام واهل الشام وكلام اهل الشام
محمد من تركيا
من سوريا
أهلا بك جاري ahmeadalbasha
وشكرا على الدعوة سأكون هناك
من سوريا
شكرا لمرورك عزيزي حامل المسك
اكيد وصل السلام ولك مني اضعافه
واكيد في جديد إن شاء الله
مايا
من سوريا
أهلا جاري محمد
على راسي والله
نورت المدونة بوجودك
شكرا الك
مايا
أختي وجارتي :
القاموس اكثر من رائع
يشرفني واستأذنك بنشر موردك مع المحافظه على حقوقك بذكر المكان المنقول منه (عنوان مدونتك) ..دعايه..وتموني..
دمت بخير وبانتظار جديدك...
أخوك وجارك
سليل الطين
أختي وجارتي :
القاموس اكثر من رائع
يشرفني واستأذنك بنشر موردك مع المحافظه على حقوقك بذكر المكان المنقول منه (عنوان مدونتك) ..دعايه..وتموني..
دمت بخير وبانتظار جديدك...
أخوك وجارك
سليل الطين
أختي وجارتي :
القاموس اكثر من رائع
يشرفني واستأذنك بنشر موردك مع المحافظه على حقوقك بذكر المكان المنقول منه (عنوان مدونتك) ..دعايه..وتموني..
دمت بخير وبانتظار جديدك...
أخوك وجارك
سليل الطين
أضف تعليقا
<<الصفحة الرئيسية
من سوريا
بعد اذنك سيدتي
تم استعارة موردك ونشره في مجموعتي البريديه مع المحافظه على حقوقك وذكر عنوان مدونتك
كوني بخير